Yunhlinh
FUX-ORN WANGC
zoc daaih nyei
[Iu-mienh nzung]
瑶歌
福安旺
着
寅卯二年洪水发 淹死人民无万千
yienh maauz nyeic nin hongh suiv faatv yiemx feiv nyienh maanh mouc maanc cin
Baeqc Waac: iem yienh caux maauz naaic deix i norm hnyangx-dauh, domh uom hlo faaux daaih yiemx lungh ndiev…yiemx mienh maanh daic camv haic nyei/daic kaav dangh nzengc
总有伏羲两子妹 无人为世不成双
zongc maaih Fuqc Hei liangc zeiv muic mouc nyienh wueih seix yaamc ziangh sorng
Baeqc Waac: Zengc njiec, kungx maaih Fuqc Hei mbuo i muoz hnangv… mv maaih dorngx lorz auv lorz nqox daaih dorng jaa zoux mienh seix aqv
无奈行游天底看 独人把棍去游天
mouc noic haengh youh tin ndiev kaanx ndoqc nyienh baav guonx qioux youh tin
Baeqc Waac: Mv haih fungc zoux ninh [Fuqc Hei] ziouc mingh saau youh mangc lungh ndiev…nduqc dauh mienh mbiaac jienv biaav mingh saau mangc seix zangc
游尽州廷无万阔 未见一人在世间
youh zienz ziou-dingh mouc maanc njietv meic ginx ietv nyienh zoix seix gen
Baeqc Waac: youh liuz ziou-dingh jangv haic nyei…yaac mv buatc maaih ietc dauh mienh iem naaiv seix zangc
见个乌龟在路上 乌龟开口话无人
ginx gorx uh guei zoix louc zangc oqv guei nqoi-kouv waac mouc nyienh
Baeqc Waac: ninh buatc norm doc iem uov [ndaamv] jauv…doc nqoi nzuih gorngv mbuox ninh se naaiv lungh ndiev mv maaih mienh mi’aqc
先人不信乌龟话 打破乌龟十二片
fin-nyienh yaamc sienx uh guei waac daav porx uh guei ziepc nyeic bin
Baeqc Waac: Fuqc Hei mv sienx doc gorngv nyei waac…mborqv doc mbaaix benx ziepc nyeic hlengx
行尽州廷无人世 撤合乌龟月也圆
haengh zienz ziou-dingh mouc nyienh seix ciev gapv oqv guei nyutc yaac yunh
Baeqc Waac: Youh gormx nzengc lungh ndiev gengh mv maaih ietc dauh mienh…daaux nqaang daaih zorqv doc-huv gapv doic—gapv duqv doc longx hnangv loz—mangc hlaax nyutc yaac junh gau
隔岸烧香火烟合 隔河种竹尾相缠
nqaeqv ngaanc siu-hung kiev in gapv nqaeqv horh zuangx duoqv mueiz fangh nzenc
Baeqc Waac: Ninh mbuo i muoz ietc laanh iem ietc bung ndoqv buov hung, liuz hung nyei sioux yaac faaux mingh gapv jienv doic…yaac nqaeqv jienv ndoqv zuangx hlauv, hlauv-dueiv yaac hlang faaux mingh nzenc jienv doic
子妹二人自相合 伏羲相合正成双
zeiv muic nyeic nyienh zeic faang-gapv Fuqc Hei faang-gapv zingx ziangh sorng
Baeqc Waac: Gorx muoc i dauh ganh ziouc longc doic…Fuqc Hei mbuo longc doic cingx benx auv-nqox
生下冬瓜无名姓 九州岛玉女架刀分
saeng njiec dong-guaa mouc mengh fingx juov ziou nyutc nyouz jaax do bun
Baeqc Waac: [Fuqc Hei nyei auv] yungz duqv norm sopc mv maaih mbuox heuc...ninh nyei auv ziouc zorqv nzuqc daaih paaix muonc
分上青山成瑶姓 分下洞中百姓民
bun zangc cing-sen ziangh iu fingx bun njiec dongc zong baeqv fingx maanh
Baeqc Waac: faatv deix faaux mingh an mbong zangc ziouc benx Iu-Mienh…aengx maaih faatv njiec mingh hietv dongc zong nyei buonc zangc ziouc benx ziex baeqv fingx nyei janx
分出五音共六群 六群瑶人共五音
bun cuotv hmz yiem juangc luoqc junx luoqc junx iu-nyienh juangc hmz yiem
Baeqc Waac: bun daaih benx biaa nyungc yiem caux juqv nyungc junx…ietc zungv Iu-Mienh juangc jienv naaiv deix biaa norm yiem caux juqv norm junx
万民世接伏羲古 六男六女配成双
waanc maanh seix nzipc Fuqc Hei gouv luoqc naamh luoqc nyouz puix ziangh sorng
Baeqc Waac: mienh maanh ietc zungv maiv gorngv haaix fingx yaac zeiz Fuqc Hei mbuo nyei fun-faqv…juqv dauh sieqv caux dorn longc doic benx auv-nqox
桃源置定花园洞 托男托女现浮阳
doh nyuonh zeix dingc kuaa-winh dongc torqv naamh torqv nyouz hinc mbiouh yaangh
Baeqc Waac: longc jienv doic liuz ?…ziouc maaih dorn maaih jueiv cuotv seix iem naaiv lungh ndiev aqv
白花落阳面向入 承顶翁爷太祖香
baeqc kuaa lorqc yaangh minc hiaangx bieqc saeng-dengv ong-yieh taaix-zouv hung
Baeqc Waac: dorn yungz daaih hmien huin bieqc maengx…dorh fai nzipc dae nzipc ong nyei zong zouv ei-douh
红花落阳面向外 命代外园为世修
hongh kuaa lorqc yaangh minc hiaangx nyiec maengc daaix nyiec winh wueih seix fiou
Baeqc Waac: sieqv yungz daaih hmien huin cuotv maengx…maengc daaix daaih oix zuqc cuotv gaengh mingh dorng jaa zoux mienh seix
男当十八取经配 女当十八嫁行乡
naamh dorng ziepc betv ciqv ging puix nyouz dorng ziepc betv jaax haengh hiaang
Baeqc waac: mh jangc dorn hnyangx-jeiv buangv ziepc betv lorz auv longc…mh sieqv dorn hnyangx-jeiv buangv ziepc betv mingh nyiec langz longc nqox/dorng jaa.
爷娘园中躲风浪 哪日云开车扇行
yieh nyaangh winh duang dorv buang laangc haaix nyietv yunh nqoi cie sinx haengh
Baeqc Waac: [mh sieqv dorn]naaic longc die maa nyei biauv daaih dorngx bingx mbiungc caux bingx nziaaux dorngx dangh baav hnangv…haaix hnoi mouc nzaanx mbiungc dingh liuz ninh mbuo ziouc mingh aqv
年当十八愁缘份 不晓经科落哪层
nin-dorng ziepc betv nzauh yunh buonc yaamc hiuv ging-kor lorqc haaix nzangh
Baeqc Waac:[gorngv taux mh sieqv dorn] hnyangx-jeiv buangv ziepc betv liuz yaac nzauh taux dorng jaa jauv…mv hiuv gorngv longc daaih nyei nqox haih hnangv haaix nor
扇落好园为福命 扇落丑园命里希
sinx lorqc kuv winh wueih fuqv maengc sinx lorqc ciouv winh maengc leiz hei
Baeqc Waac: mingh longc duqv kuv nqox nor, funx wueih maengc longx haic nyei…yorv-waanh, longc duqv nqox-wuaaic nor, gengh sei laaix maengh hei haic

鸳鸯配为和诺意 丑园当比好园修
yin-yaang puix weih horh norh eix ciouv winh dorngx beiv kuv winh fiou
Baeqc Waac: fou caux cai horc-norh horc-kix nor…biauv zong ndongc haaix jomc kouv yaac maaih njien-youh hnyouv nyei
鸳鸯不有和诺意 好园当比丑园修
yin-yaang yaamc maaih horh norh eix kuv winh dorngx beiv ciouv winh fiou
Baeqc Waac: nqox caux auv mv horpc doic nor…benx ndongc haaix yaac mv maaih dorngx njien-youh
阴罗分排不同命 福命不平随命召
yiem-lorqc bun-pai yaamc dongh maengc fuqv-maengc yaamc baengh sueih maengc ziu
Baeqc Waac: lungh zangc bun daaih nyei maengc se mv fih hnangv…duqv longx nyei jauv sei mv baengh oix zuqc sueih ganh nyei maengc ziu hnangv
男人取经望成职 女人行嫁望成林
naamh nyienh ciqv ging mongc ziangh zeqv nyouz nyienh haengh jaax mongc ziangh liemh
Baeqc Waac: mh jangc dorn longc auv… caux mh sieqv dorn longc nqox sei hnamv jienv oix zoux benx mienh benx seix
少年欢由心重嫩 爱听老人古话修
siux nin njien-youh fiem zongc nunc oix tingx loz nyienh gouv waac fiou
Baeqc Waac: [gorngv bun mienh lunx mienh] mienh lunx mienh hnyouv zongc sei lunx gengh haiz njien-youh gau…oix zuqc muangx mienh gox mbuo gorngv nyei waac/gouv
细心投缘上京位 嫩心爱听老人言
faix fiem ndaauh yunh zangc jing wueic nunc fiem oix tingx loz nyienh nyinh
Baeqc Waac: [gorngv bun houx-saeng mienh] ginv auv longc se zuqc faix fiem nyei…mienh lunx mienh oix zuqc muangx domh mienh gorngv
一望路途光流亮 二望合盆书意通
yietc mongc louc douh njang liouh laangc nyeic mongc horpc bunh sou-eix tong
Baeqc Waac: [gorngv bun lorz auv longc nyei houx-saeng] oix longc auv…da’ietv jauv oix zuqc njang…da’nyeic mangc sou mangc nzangc yaac oix zuqc longx
三望灵签齐点挂 政算经科得共为
faam mongc lingh cim nzoih dimv guaax zingx funx jing-kor duqv juangc wueih
Baeqc Waac: da’faam jouh cim dimv guaax yaac zuqc longx fih hnangv..hnangv naaic nor longc jienv cingx longx
几壬算来天恩配 阴阳相配政成双
ziex yiemc funx daaih tin-en puix yiem-yaangh fangv puix zingx ziangh sorng
Baeqc Waac: ziex yiemc zungv longx nzengc sei wueic zeiz lungh zangc yaac buatc longx bun longc doic…mh jangc caux mh sieqv ih dauh longc jienv doic cingx benx kuv auv-nqox
得识上娇安心位 抛下四边莲柳花
duqv zeqv zangc jiuh orn fiem wueic mbeu-njiec feix bin lienh lioux kuaa
Baeqc Waac: [gorngv bun zoux nqox mienh] maaih liuz auv oix zuqc buangv hnyouv…oix zuqc guangc njiec nziaauc sieqv nyei jauv
莲柳花开满朝上 不影朝中有位心
lienh lioux kuaa-nqoi mienx ziuh zangc yaamc aengv ziuh duang maaih wueic fiem
Baeqc Waac: sieqv-nzueic maaih buangv langz…mv zoux bun benx liuz nqox nyei mienh nyei hnyouv mingh hanc
青云进天有椅位 椅上逍遥莫乱心
cing yunh zanx tin maaih eiv wueic eiv zangc siu-iuh iv lunc fiem
Baeqc Waac: maaih jienv auv beiv hnangv zueiz jienv eiv nor…njien-youh haic aqv, mv dungx mingh zoux hnyouv lunc tipv aqv
投经取顾人伦世 安家有位好名声
ndaauh ging ciqv goux nyienh luonh seix orn jaa maaih wueic kuv mengh sing
Baeqc Waac: longc auv naaic se longx daaih goux mienh seix…dorng jienv jaa/maaih auv-jueiv naaic zeiz nyungc kuv mengh sing
安家恩情诉不尽 养命恩情加一言
on jaa en-zingh sux yaamc zienz yungz maengc en-zingh jaa ietv nyinh
Baeqc Waac: auv-nqox jauv gorngv mv gaengh nzengc…aengx oix tov gorngv deix domh mienh diex maac nyei en-zingh jauv tipv
养命恩情诉不透 阴阳分排不平排
yungz maengc en-zingh sux yaamc toux yiem-yaangh bun-paaiv yaamc baengh mbaih
Baeqc Waac: yungz maengc nyei en-zingh gorngv mv haih nzengc/cing…lungh zangc bun-pai daaih yaac mv baengh dangv caux mv fih ndongc
百吊排来由命算 万吊排来随命召
baeqv diuc mbaih daaih youh maengc funx waanc diuc mbaih daaih sueih maengc ziu
Baeqc Waac: ginx nyungc, oix benx longx fai benx ciouv, zuqc mangc mbuo ganh nyei maengc buangh zuqc hnangv
有爷落姐也作养 天恩地福莫忘情
maaih yieh lorqc ziev yaac zuqc yungz tin-en deic fuqv iv muangh zingh
Baeqc Waac: maaih dae, maa daic liuz, yaac zuqc yungz dae…dae nyei en caux maa nyei zingh naaic oix zuqc mv dungx la’kuqv
爷所养人公德路 想到爷恩双泪流
yieh sorv yungz nyienh gong-daqv louc fangv taux yieh en sorng lueic liouh
Baeqc Waac: dae yungz mbuo naaic zeiz ietc diuh domh gong-daqv nyei jauv…hnamv taux dae nyei en-zingh hnangv uom-mueic zungv liouc cuotv aqv
有姐落爷也作养 天分地算随命召
maaih ziev lorqc yieh yaac zuqc yungz tin-bun deic funx sueih maengc ziu
Baeqc Waac: maaih maa ganh ,dae daic liuz, yaac oix zuqc yungz maa…lungh zangc zeix daaih nyei jauv naaic sueih binc maengc ziu hnangv
朝朝敬娘公德路 想到娘恩双泪流
ziu-ziu gengx nyaangh gong-daqv louc fangv taux nyaangh en sorng-lueic liouh
Baeqc Waac: hnoi-hnoi mangc maa, taaih maa maaih jaax zeiz diuh fiou fim fiou gong-daqv jauv…jangx taux maa nyei en haaix zanc uom-mueic cuotv aqv
不有天分平等命 男女也有孝顺恩
yaamc maaih tin-bun baengh dangv maengc naamh nyouz yaac maaih hiaaux suonc en
Baeqc Waac: lungh zangc bun daaih nyei maengc bun mbuo sei mv fih hnangv…maaih deix dorn-jueiv sei haih hnamv domh mienh nyei
几多亲生不养命 几多求来养恩情
ziex dor cien-saeng yaamc yungz maengc ziex dor jiouh daaih yungz en-zingh
Baeqc Waac: ziex dor ganh yungz daaih nyei dorn-jueiv yaac mv uix diex-maac…yaac maaih ziex dor hlorpv daaih nyei dorn-jueiv uix caux hnamv domh mienh
阴阳分排为人世 百样事情望测清
yiem-yaangh bun-pai wueih nyienh seix baiv yangc nzaic zingh mongc nzaqv cing
Baeqc Waac: lungh zangc fungx mbuo daaih benx mienh iem naaiv lungh ndiev…nyungc-nyungc mbuo oix zoux nyei jauv oix zuqc hnamv cing liuz manc zoux
阳识细心道理正 阴识细心神圣恩
yaangh zeqv faix fiem doz-leiz zingx yiem zeqv faix fiem zienh singx en
Baeqc Waac: zoux mienh naangh mienh sic zuqc ei jienv doz-leiz mv dungx zoux ngau…gorngv taux buoqc zangc jauv yaac zuqc faix fiem nyei
秀错阳间犯阳罪 阳官断了世平安
fioux caqv yaangh gen baamz yaangh zuiz yaangh jien dunx liuz seix baengh orn
Baeqc Waac: zoux dorngc mienh naangh mienh naaic sei dorngc mbuo mienh nangh mienh nyei leiz-fingx…mienh naangh mienh nyei jien paaiv liuz sic yaac sung mi’aqv
秀错神圣阴间罪 不到阴皇事不清
fioux caqv zienh singx yiem gen zuiz yaamc taux yiem-hungh nzaic yaamc cing
Baeqc Waac: sei gorngv zoux dorngc mienv nyei jauv naaic sei dorngc mienv nyei leiz…dorngc zuqc mienv nyei zuiz nor, mv daic mingh taux mienv nyei lungh ndiev sic jiuv mv haih sung aqv
阳罪有银买得命 阴罪有钱难抵挡
yaangh zuiz maaih nyaanh maaiz duqv maengc yiem zuiz maaih zinh naanh div dorng
Baeqc Waac: dorngc mienh naangh mienh nyei leiz naaic maaih nyaanh maaiz duqv ndutv zuiz nyei…se gorngv dorngc zuqc mienv nyei leiz nor maaih nyaanh yaac mv lamh longc/nyaanh yaac tengx jaiv mienv nyei sic mv ndutv
黄金难买长生命 阴皇挂步命作当
yangh jiem naanh maaiz daangh saeng maengc yiem-hungh guaax bouc maengc zuqc dorng
Baeqc Waac: Jiem yaac maaiz mv duqv maengc ndaauv ziangh…mienv daaih zorqv nyei hnoi oix zuqc daic aqv
坟山托得聪明肚 度钱敬圣细心修
buonh sen torqv duqv cong-mengh douv douc zinh gengx singx faix fiem fiou
Baeqc Waac: zouv[biopv zangx dorngx] naaic haih zoux bun fun-faqv guai nyei…hnangv naaic sipv mienv jauv oix zuqc faix-faix fiem-fiem
神圣面前细心敬 甲子过头生死清
zienh singx minc zinh faix fiem gengx jaapv-zaangv jiex dauh saeng feiv cing
Baeqc Waac: mienv nyei jauv oix zuqc faix fiem nyei mingh dorh…taux mbuo daic nyei ziangh hoc yaac daic duqv cing
阴司翁爷平安位 阳间男女得欢由
yiem-fei ong-yieh baengh orn wueic yaangh gen naamh nyouz duqv njien-youh
Baeqc Waac: diex maac baengh orn nyei iem mienv deic bung nor…ziangh iem seix zangc nyei dorn-jueiv yaac duqv njien-youh
聪明顾正阴间事 神圣面前望秀清
cong-mengh goux zingx yiem gen nzaic zienh singx minc zinh mongc fioux cing
Baeqc Waac: guai nyei mienh ? goux longx mienv nyei jauv…dorh mienv jauv zuqc dorh cing nyei
Note: naaiv nzuotv nzung ie mv mengh nzung eix guaih cai faan daaih hnangv
官识依律顾阳事 阳间百姓望分清
jien zeqv ei latc goux yaangh nzaic yaangh gen baeqv-fingx mongc bun cing
Baeqc Waac: benx jien maaih zeqv nyei mienh oix zuqc ei jienv doz-leiz/latc diuc daaih liuc leiz yaangh gen nyei sic hnangv…oix paaiv/oix dunx lungh ndiev baeqv-fingx nyei mouz nyungc sic oix zuqc mangc bun cing liuz manc zoux

官府欢由有吊忆 富贵家毫有吊愁
jien-fouv njien-youh maaih diuc ieqv fuqv-gueix jaa-haauh maaih diuc nzauh
Baeqc Waac: benx jien nyei mienh, seix zangc mienh sienx gorngv ninh mbuo maaih diuc njien-youh haic, mv baac zien sic nor ninh mbuo yaac maaih diuc nzauh nyei…mienh benx mienh nyungc-nyungc maaih nzoih mv baac yaac fih hnangv nyei maaih nzauh nyei dorngx nyei
日日无灾欢由树 哪日有灾愁乱心
nyietv nyietv mouc zoi njien-youh zouc haaix nyietv maaih zoi nzauh lunc fiem
Baeqc Waac: hnoi-hnoi mv maaih zoi mv maaih naanc haiz njien-youh gau…zuov maaih zei maaih naanc uov hnoi nzauh gau hnyouv lunc nzengc
妻对有灾怕错偶 男女有灾怕错香
cai-doix maaih zei nziex caqv ngorx naamh nyouz maaih zoi nziex caqv hung
Baeqc Waac: auv/nqox maaih mun maaih baengc nor, mbuo gamh nziex jienv ganh haih zuqc guaav…dorn-jueiv maaih baengc nor gamh nziex jienv dieh hnoi mv maaih mienh nzipc mbuo nyei buonv fai buov hung gengx ganh[nzipc mbuo nyei zong-zei ei-douh]
世上钱财也作使 血宝花珠也欠求
seix zangc zinh zoih yaac zuqv saaiv hiutv-buv kuaa-zou yaac qiemx jouh
Baeqc Waac: ziangh daaih iem naaiv lungh ndiev zinh nyaanh yaac qiemx zuqc longc nyei…dorn-jueiv yaac qiemx zuqc jouh nyei
富贵贫穷欠男女 万民有吊挂肚心
fuqv-gueix baengh juangh qiemx naamh nyouz waanc maanh maaih diuc guaax douv fiem
Baeqc Waac: mv gorngv mienh benx mienh fai mienh jomc mienh, ietc zungv oix longc dorn oix maaih jueiv…ginx dauh mienh maaih diuc kuonx hnyouv nyei jauv
到了年情五百岁 星斗退潮不管尸
taux liuz nin-zingh hmz baeqv fuix fing-dauv tuix ziuh yaamc gunv sei
Baeqc Waac: taux daic nyei uov hnoi…qiex dangx mv gunv sei aqv
男女成行身尸贵 身尸落地当黄金
naamh nyouz ziangh horngh sin-sei jaaix sin-sei lorqc deic dorngx yangh jiem
Baeqc Waac: [gorngv taux daic nyei mienh]se gorngv ninh mbuo maaih dorn-jueiv ziangh horngh nor, daic nyei ziangh hoc sin-sei jaaix…dorn-jueiv biopv zangx ninh mbuo hnangv jiem nor
男女不成身尸贱 身尸落地当黄泥
naamh nyouz yaamc ziangh sin-sei zinc sin-sei lorqc deic dorngx yangh naih
Baeqc Waac: maaih dorn-jueiv mv ziangh horngh nyei mienh, daic nyei ziangh hoc sin-sei zaanc haic…dorn-jueiv biopv zangx ninh mbuo hnangv nie-yangh/uom-baamc-yangh nor
父母身尸清净去 阳间端仔得欢由
buoqc mouz sin-sei cing-nzengc qioux yaangh gen dorn-jueiv duqv njien-youh
Baeqc Waac: diex-maac daic liuz maaih jauv zoux cing nor…dorn-jueiv zoux mienh seix iem naaiv lungh ndiev duqv njien-youh
几世秀来团圆福 几代秀来安乐肌
ziex seix fioux daaih dunh yunh fuqv ziex doic fioux daaih orn-lorqc jei
Baeqc Waac: benx maaih fuqv-gueix caux maaih orn-lorqc hnyouv naaic…zeiz ziex seix ziex doic fiou fiem cingx haih duqv daaih
行顺政有平安世 行恶怕有亏世愁
haengh suonc zingx maaih baengh orn seix haengh orqv nziex maaih kuei seix nzauh
Baeqc Waac: zoux longx nyei jauv cingx duqv baengh orn…zoux wuaaic nyei jauv nor nzauh heix haih maaih hoic mbuo zuqc kuonx hnyouv jauv nyei dorngx
父母面前细心正 有理无文答谢章
buoqc mouz minc zinh faix fiem zingx maaih leiz mouc wuonh daapc ziec zaang
Baeqc Waac: bun dae bun maa, oix zuqc faix fiem nyei caux hnyouv oix zuqc zaqc nyei…maaih leiz ndongc haaix yaac mv maaih waac mv maaih wuonh zaang daaih daapc ziec duqv ninh mbuo nyei en-zingh
江水长流刘三置 万人在世托花浮
gorng-suiv daangh liouh liouh faam zeix waanc maanh zoix seix torqv kuaa mbiouh
Baeqc Waac: maaih ndoqv maaih ndaaih torngx liouc mv dingh se zeiz Liouh Faam zeix daaih…mienh camv iem naaiv lungh ndiev zungv yungz dorn yungz jueiv
托生恩情挂在肚 公德恩情进在心
torqv saeng en-zingh guaax zoix douv gong-daqv en-zingh zanx zoix fiem
Baeqc Waac: yungz maengc[maac nyei]en-zingh zuqc jangx an jienv hnyouv…zoux daaih uix[diex nyei]en-zingh yaac fih hnangv jangx an jienv fiem
天恩赐福落细雨 地恩赐禄养成人
tin-en ceix fuqv lorqc faix yiv deic en ceix loqc yungz ziangh nyienh
Baeqc Waac: dae hnangv lungh duih mbiungc…maa hnangv ndau benx dorngx bun mbuo nyei singx maengc ziangh daaih—cingx benx mienh
桃源开枝成孕内 内里开枝成嫩央
doh nyuonh nqoi-zei ziangh nyuonh noic noic leiz nqoi-zei ziangh nunc yaang
Baeqc Waac: iem maa nyei ga’sie gu’nyuoz benx gu’nguaaz
花朵上孕九月忆 变个秀才困娘身
kuaa-dorv zangc nyuonh juov nyutc ieqv benx gorx fiou-zoih kuonx nyaangh sin
Baeqc Waa: gu’nguaaz maaih faaux sin liuz maa zuqc nzauh nduoh hlaax nyeic…hnangv norm fiou-zoih nor kuonx jienv maa nyei sin zangc
父母有心养花朵 朝朝夜夜作奴修
buoqc mouz maaih fiem yungz kuaa-dorv ziu-ziu yiex-yiex zoux nouh fiou
Baeqc Waac: diex-maac maaih hnyouv yungz dorn-jueiv...hnoi-hnoi muonz-muonz zuqc zoux nouh
做奴望得眼前福 顾花望得孝顺心
zoux nouh mongc duqv nginx zinh fuqv goux kuaa mongc duqv hiaaux suonc fiem
Baeqc Waac: zoux nouh yaac laaix oix minc zinh duqv deix zinh nyaanh daaih saaiv longc…dorh dorn dorh jueiv yaac laaix oix bun ninh mbuo hiuv duqv hnamv ganh caux goux ganh dongh mbuo gox nyei hnoi-nyiec taux
天恩照顾天恩养 把娘血宝养长生
tin-en ziux goux deix en yungz baav nyaangh hiutv-buv yungz daangh saeng
Baeqc Waac: dae zoux daaih uix mbuo, maa yungz mbuo cuotv daaih…maa uix nyorx mbuo cingx ziangh iem naaiv lungh ndiev--mv daic
想男想女无样比 想过钱财识名声
fangv naamh fangv nyouz mouc yangc beiv fangv jiex zinh zoih zeqv mengh sing
Baeqc Waac: hnamv dorn hnamv jueiv mv maaih haaix nyungc beiv duqv…aengx gauh hnamv jiex ndaangc hnamv jiem hnamv nyaanh caux hnamv oix benx jien fai maaih mengh sing jauv
有钱有财心未稳 爱求血宝正安心
maaih zinh maaih zoih fiem meic uonv oix jiouh hiutv-buv zingx orn-fiem
Baeqc Waac: maaih zinh nyaanh liuz hnyouv yaac zongc mv gaengh dingc…duqv liuz dorn-jueiv cingx buangv hnyouv
求得血宝安心位 同得仙桃养命丝
jiouh duqv hiutv-buv orn-fiem wueic ndongc duqv fin-doh yungz maengc fei
Baeqc Waac: maaih liuz dorn-jueiv gengh a’hneiv haic…beiv ndongc duqv lungh zangc nyei ba’jaauh biouv uov nor longx hnyouv
贫穷也为养男女 无日赚钱为带花
baengh juangh yaac wueic yungz naamh nyouz mouc nyietv zornc zinh wueic daaix kuaa
Baeqc Waac:[benx diex-maac mienh winx jomc kouv jauv nyei waac] jomc yaac wueic laaix dorh dorn dorh jueiv…mv maaih ziangh hoc zornc zinh zornc nyaanh yaac laaix dorh dorn-jueiv
未带上春无人顾 带起上春耕种希
meic daaix zangc cun mouc nyienh goux daaix kiqv zangc cun gaeng-zuangx hei
Baeqc Waac: mv dorh jienv mingh ndeic yaac mv maaih mienh mangc…dorh jienv mingh ndeic, buoz maiv henh mv duqv zoux gong, gaeng-zuangx cingx mv benx
秀错一年饿几岁 拖男带女卖工游
fioux caqv ietv-nin ngorc ziex fuix dorh naamh daaix nyouz maaic gong youh
Baeqc Waac: gaeng-zuangx mv benx ietc cun, oix zuqc ngorc hnaangx ziex hnyangx…oix zuqc dorh jienv dorn-jueiv saau youh maaic gong bietv nyanc aqv
带到春中无园居 住在爷娘背上当
daaix taux cun-duang mouc winh zepv zepv zoix yieh nyaangh buix zangc dorng
Baeqc Waac: dorh [gu’nguaaz]taux ndeic-zorng mv maaih biauv bun iem…diex-maac oix zuqc nyiex jienv iem di’daanx
月上东天怕月晒 雨落西天怕雨淋
nyutc zangc dong-tin nziex nyutc saaix yiv lorqc fai-tin nziex yiv liemh
Baeqc Waac: mba’hnoi iem dong-bung maengx cuotv daaih yaac gamh nziex nyutc haih pui mun gu’nguaaz…mbiungc iem mba’hnoi-ndortv maengx duih daaih yaac gamh nziex mbiungc haih liemh zuqc fu’jueiv
养男养女辛苦命 受了几多被饿饥
yungz naamh yungz nyouz fin-kouv maengc siouc liuz ziex dor beic ngorc jei
Baeqc Waac: dorh dorn dorh jueiv gengh sei siouc fin-kouv jauv camv haic…siouc hnyouv sie caux siouc ngorc hnaangx camv haic nyei
花林出树成人世 养命恩情千莫休
kuaa-liemh cuotv zouc ziangh nyienh seix yungz maengc en-zingh cin yiv hiou
Baeqc Waac: dorn-jueiv hlo liuz benx mienh aqv hnangv biangh ziangh benx biouv mi’aqc…cin-maanc mv dungx la’kuqv domh mienh nyei yungz maengc domh en-zingh
少年欢由心重嫩 爱听老人古话修
siux nin njien-youh fiem zongc nunc oix tingx loz nyienh gouv waac fiou
Baeqc Waac: mienh lunx mienh hnyouv zongc sei lunx caux njien-youh haic…tov muangx deix mienh goz mienh nyei waac oc

前人造古后人听 随便心肌行哪层
zinh nyienh zoc gouv hoz nyienh tingx sueih binc fiem-jei haengh haaix nzangh
Baeqc Waac: zinh biuc mienh fiev nzung daaih bun hoz baan mienh muangx…sueih binc hnyouv oix fai mv oix/muangx fai mv oix muangx
老人难转嫩人意 嫩人转老易为修
loz nyienh naanh nzuonx nunc nyienh eix nunc nyienh nzuonx loz heic wueih fiou
Baeqc Waac: mienh goz mienh aqc duqv zoux gan mienh lunx mienh nyei hnyouv…mienh lunx mienh zoux ei mienh goz mienh nor gengh gauh heic aqv
人老岁长无好像 莫笑老人丑像人
nyienh loz fuix daangh mouc kuv fangx yiv siux loz nyienh ciouv fangx nyienh
Baeqc Waac: mienh gox /hnyangx-jeiv camv daaih hmien-fangx mv nzueic aqv…mv dungx jatv mienh gox mienh nyei hmien-fangx oc
寒公寒母难算命 不奈何时命落亏
hornh gong hornh muv naanh funx maengc yaamc noic horh zeih maengc lorqc kuei
Baeqc Waac: mienh gox liuz mangc mv buatc maengc aqv…haaix zanc daic yaac mv hiuv
夫离妻离莫怨命 怨心流乱赛姻缘
fou leih cai leih yiv winx maengc winx fiem liouh lunc saaix yiem-unh
Baeqc Waac: guangc auv guangc nqox jauv mv dungx guaiz maengc…zuqc guaiz hnyouv camv hnyouv lunc oix haic beiv saaix saeng hienx jauv
夫离妻离人心乱 莫怨命中怨乱心
fou leih cai leih nyienh fiem lunc iv winx maengc duang winx lunc fiem
Baeqc Waac: guangc auv guangc nqox laaix mbuo nyei hnyouv lunc…mv dungx guaiz maengc zuqc guaiz ganh nyei hnyouv lunc hnangv
莫笑人伦守寡世 莫谈人世半桥休
iv siux nyienh luonh siouv guaav seix iv daanh nyienh seix bienx jiuh hiou
Baeqc Waac: mienh nyei nqox fai auv daic liuz, mbuo mv horpc zuqc jatv mienh…mienh longc gau doic mv ziangh guangc liuz doic yaac mv dungx guaih gorngv doqc mienh
世上阴阳置有尽 几多欢由几多愁
seix zangc yiem-yaangh zeix maaih zienz ziex dor njien-youh ziex dor nzauh
Baeqc Waac: [gorngv taux lungh ndau zeix bun mbuo nyei maengc] iem naaiv lungh ndiev hnangv haaix nor yaac maaih nzoih…maaih deix duqv njien-youh maaih deix zuqc doh naanc
置有哑口不会话 置有伶俐赛文章
zeix maaih aqv kouv yaamc haih waac zeix maaih lienh lix saaix wuonh zaang
Baeqc Waac: maaih deix ziangh daaih benx mienh hngongx mienh liemh waac mv haih gorngv…maaih deix guai gau haih dorh guai nyei jauv daaih beiv saaix doic
又有丑像难度世 又有丑像得欢由
youc maaih ciouv fangx naanh douc seix youc maaih ciouv fangx seix njien-youh
Baeqc Waac: maaih deix mv nzueic mv liuz maengc yaac mv benx caux jienv…maaih deix ziangh daaih mv nzueic mv baac njien-youh nyei
踫作顺人莫欺负 踫作聪明莫赛文
buangh zuqc suonc nyienh iv ki fux buangh zuqc cong-mengh iv saaix wuonh
Baeqc Waac: buangh zuqc mienh suonc mienh mv dungx ki…buangh zuqc guai nyei mienh mv dungx caux saaix wuonh zaang
会踫丑像莫谈笑 会踫好像莫投心
wuic buangh ciouv fangx iv daanh siux wuic buangh kuv fangx iv ndaauh fiem
Baeqc Waac: buangh zuqc mienh mv nzueic nyei mienh mv dungx gorngv jatv…buangh zuqc mienh nzueic mienh mv dungx ba’laqc sienx hnyouv cung
在世凡人几层命 欢由多愁在眼前
zoix seix baamh nyienh ziex nzangh maengc njien-youh dor nzauh zoix nginx zinh
Baeqc Waac: lungh ndiev mienh nyei maengc sei maaih ziex nzangh ziex yiemc…njien-youh aqv fai nzauh kouv naaic ietc dangh jiex hnangv benx cuotv daaih mi’aqc
又有嫩花抛爷姐 困死爷娘在世度
youc maaih nunc kuaa mbeu-yieh ziev kuonx feiv yieh nyaangh zoix seix doh
Baeqc Waac: yaac maaih mienh lunx mienh daic guangc domh mienh…zoux bun diex-maac hnyouv mun gau iem naaiv lungh ndiev doh naanc
几多爷娘抛嫩仔 逃逃难难受寒浮
ziex dor yieh nyaangh mbeu-nunc zaiv doh doh naanc-naanc siouc hornh mbiouh
Baeqc Waac: yaac maaih ziex dor domh mienh daic guangc zongc se faix haic nyei fuqc jueiv …hoic ninh mbuo doh doh naanc-naanc benx fu’jueiv-gu’hanh iem naaiv lungh ndiev
又有当年退缘份 春间无雨水塘干
youc maaih dorng-nin tuix yunh buonc cun-gen mouc yiv suiv dorngh nqaai
Baeqc Waac: yaac maaih deix longc doic taux ndaamv-seix hnangv auv fai nqox daic mi’aqc…beiv ndongc cun gueix uov nor mv maaih mbiungc , uom-njaangh nqaai nzengc
害了几多人伦世 受寡深情心未干
hoic liuz ziex dor nyienh luonh seix siouc guaav siem-zingh fiem meic nqaai
Baeqc Waac: [naaic diuc naanc zingh jauv]hoic liuz ziex dor mienh nyei [fou-cai]seix…benx auv-guaav/nqox-guaav nyei naanc zingh buangh liuz hnyouv gengh mv nqaai
阴罗置图不平字 甲子未圆星又蒙
yiem-lorqc zeix douh yaamc baengh nzangc jaapv-zaangv meic yunh fing youc muangh
Baeqc waac: lungh zangc zeix daaih nyei jauv sei mv fih hnangv mv fih mbaengc…maaih deix hnyangx-jeiv iem mv gaengh buangv luoqc ziepc zungv daic mi’aqc
置得有图不依古 不到寿源神又勾
zeix duqv maaih douh yaamc ei gouv yaamc taux siouc nyuonh zienh yiouc gaau
Baeqc Waac: lungh zangc zeix daaih nyei jauv sei mv zeiz ei jienv jiex daaih uov nor…ziangh mv gaengh duqv lauh yiouc zuqc mienv zorqv [daic] mi’aqc
到了阴罗分勾部 天星地宿救难鱼
taux liuz yiem-lorqc bun gaau bouc tin-fing deic sokv njioux naanh nyouh
Baeqc Waac: taux daic nyei uov hnoi…haaix nyungc yaac mv haih njioux duqv bun maengc ziangh iem
官府皇人有错命 道理通天留未回
jien fouv hungh nyienh maaih caqv maengc doz-leiz tong tin liouh meic wuih
Baeqc Waac: domh jien domh hungh yaac maaih maengc mv benx nyei ziangh hoc…taux hnoi daaih, maaih leiz hlo lomh lungh yaac tengx mv duqv
百万状元千金命 人算不清命算清
baeqv waanc zorngc yunh cin-jiem maengc nyienh funx yaamc cing maengc funx cing
Baeqc Waac: oix maaih nyaanh laanv fai oix duqv benx domh jien fai oix maaih kuv maengc nyei mienh…maaih ziex nyungc jauv iem naaiv lungh ndiev mbuo mienh se funx mv haih cing…sueih binc maengc buangh hnangv
富贵贫穷同条命 钱财血宝不平排
fuqv-gueix baengh juangh dongh diuh maengc zinh zoih hiutv-buv yaamc baengh mbaih
Baeqc Waac: maengc nyei jauv naaic mv gorngv mienh benx mienh fai mienh jomc mienh zungv baengh dangv nyei/mienh benx caux mienh jomc mienh nyei singx maengc maaih jaax-zinh fih ndongc nyei…nyaanh zinh caux dorn-jueiv se maaih daaih mv haih fih ndongc
男女钱财随命受 但凡有吊上行人
naamh nyouz zinh zoih sueih maengc siouc daan-faanh maaih diuc zangc horngh nyienh
Baeqc Waac: oix maaih dorn-jueiv fai zinh nyaanh naaic se sueih binc maengc gorngv hnangv…daan-faanh maaih diuc yaac funx gorngv zangc horngh mienh aqv
血宝钱财无一吊 算为贱命下行人
hiutv-buv zinh zoih mouc ietv diuc funx wueih zinc maengc haac horngh nyienh
Baeqc Waac: se gorngv dorn-jueiv caux zinh nyaanh i nyungc yaac mv maaih nor…cingx funx wueih mienh maengc zaanc mienh
官府朝廷望百姓 百姓万民靠米粮
jien-fouv ziou-dingh mongc baeqv-fingx baeqv-fingx waanc maanh kaux hmeiv laangh
Baeqc Waac: oix duqv benx jien caux oix maaih deic-bung yaac kaux bangc baeqv-fingx mbuo…baeqv-fingx mbuo maaih singx maengc iem naaiv lungh ndiev yaac zuqc bangc kaux mbiauh hmeiv
天底米粮第一号 血宝钱财第二层
tin ndiev hmeiv-laangh da’ietv hoc hiutv-buv zinh zoih da’nyeic nzangh
Baeqc Waac: seix zangc jaaix jiex se zeiz hnaangx…njiec daaih cingx zeiz dorn-jueiv caux zinh nyaanh
五谷禾皇细心敬 钱财血宝奈劳心
hmz-guqv wuoz-hungh faix fiem gengx zinh zoih hiutv-buv noic laauh fiem
Baeqc Waac: goux gaeng-zuangx nyei zienh singx yaac oix zuqc faix fiem nyei dorh…nyaanh zinh zuqc longc hnyouv zornc caux dorn-jueiv yaac zuqc longc hnyouv dorh
强人恶肚害人命 冤枉流连在眼前
qaangv nyienh orqv douv hoic nyienh maengc uin-wangv liouh linh zoix nginx zinh
Baeqc Waac: qaangv maanh/hnyouv doqc mienh dongh hoic mienh maengc uov deix…minc zinh ziangh hoc ziouc caux mienh gitv uin benx wangv caux borqv jienv mingh mv haih liuz aqv
阴阳置有千里眼 世上事情见得清
yiem-yaangh zeix maaih cin leiz nginx seix zangc nzaic zingh ginx duqv cing
Baeqc Waac: mienv nyei mh zingh mangc buatc duqv go haic…lungh ndiev nyei sic ninh mbuo buatc duqv cing-cov gau
那人良心使不正 未经一七圣言浮
haaix nyienh laangh fiem saaiv yaamc zingx meic ging ietv-cietv singx nyinh mbiouh
Baeqc Waac: haaix dauh mienh zoux hnyouv mv zaqc…mv haih jiex ndongc haaix lauh ziouc haih buatc mienv nyei siemv leiz jauv aqv
暗得阳心阴未暗 阳口未开阴口开
ormx duqv yaangh fiem yiem meic ormx yaangh kouv meic nqoi yiem kouv nqoi
Baeqc Waac: [mbuo zoux nyei sic]bingx duqv jienv mienh naangh mienh hnangv, mienv naaic bingx mv jienv…mienh naangh mienh gorngv fai noic mv duqv mbuo , mienv noic duqv nyei
公德之人莫杀命 大小一条性命丝
gong-daqv ziqc nyienh iv setv maengc daaic fiuv ietv-diuh singx maengc fei
Baeqc Waac: fiou fiem fiou gong-daqv nyei mienh mv dungx daix maaih singx maengc nyei ga’naaiv…hlo faix yaac zeiz ietc diuh maaih jaax-zinh nyei singx maengc
虫鬼万行同条命 落阳个个爱长生
gaeng-gueiv waanc horngh dongh diuh maengc lorqc yaangh gorx-gorx oix daangh saeng
Baeqc Waac: gaeng-gueiv singx horngh yaac dongh diuh maengc[ mangc ganh nyei maengc maaih jaax-zinh fih hnangv]…ginx nyungc ziangh daaih oix iem lauh ndaauv mv oix daic nziouv
{dorng 终dorng}

Nzung-Waac Faan Benx Baeqc Waac
Note: iem Iu-Mienh nzung duang, maaih deix Kaeqv-nzangc se zeiz longc daaih div mienh waac. Naaiv deix nzangc mv maaih kaeqv-nzangc nyei waac-eix.
Note: Some Chinese characters are used to stand for Mien words thus they have no meaning as in Chinese.
NZANGC-SOQV & KUANGX PORNG DUANG NYEI NZANGC SAAIV LONGC GORNGV MENGH
bhn=beiv hnangv fai nyungc zeiv dorn
enzf=ei jienv Kaeqv-nzangc nyei waac-eix faan
[…] porv taux mouz nyungc jauv hnangv
/=fai
hiaang-bung waac: dorngx dauh nyei mienh doqc fai gorngv pioux doic nyei waac
aqv kouv哑口hngongx fai mv haih gorngv waac
baam-nyienh 凡人 baam-gen nyei mienh
baengh dangv 平等 [leiz] fih mbaengc fai fih ndongc
baengh juangh 贫穷jomc zinh jomc nyaanh
baeqc kuaa 白花[enzf: biangh baeqc]dorn
beic ngorc jei 被饿饥 zuqc hnyouv sie fai mv maaih laangh ziqc daaih
nyanc
bin 片hlengx fai kuaaiv
buang 风 nziaaux
buix 背 diqc daanx
buonh sen 坟山 zouv-gemh
caqv 错 dorngc fai zoux dorngc[leiz]
cien saeng 亲生ganh yungz daaih nyei[dorn-jueiv]
cing-sen 青山gemh maeng fai mbong
ciouv 丑 mv nzueic fai aqc mangc; dongh guen taux ga’qiex uov norm
“ciouv” nzangc nyei buonc cingv mangc “orqv” nzangc
cun 春1. cun gueix fai biangh nqoi nyei gueix 2. siang-hnyangx 3. lingh
deic
daaic 大 hlo [bhn: ~ zunh=domh nzaangv]
daangh 长 ndaauv
daangh saeng 长生 ziangh duqv lauh
daanh 谈[enzf: caux doic gorngv waac]gorngv doqc mienh
div dorng 抵挡tengx zaeqv fai dangv
doh nyuonh dongc 桃源洞[enzf: mh sieqv nyei lamx-mbueix dorngx] naaiv
se ei jienv janx-kaeqv nyei mv zingx dorngx
waac nyei waac-eix ?
dongc zong 洞中ndau-baengh dorngx/maaih zingh mungv dorngx
dong-guaa 冬瓜 sopc
dorh naamh daaix nyouz 拖男带女 dorh dorn yungz jueiv
dorng-nin当年[enzf: dongh uov norm hnyangx]deng-deng nzueic caux henv
nyei ziangh hoc nyei eix-leiz
douv 肚 [enzf: ga’sie]dorngx “hnyouv”nzangc daaih longc bhn: orqv ~
duoqv竹hlauv
faatv发 butv fai butv faaux; hlo faaux nyei eix-leiz
fangv 想 hnamv jangx [to think]
feiv 死 daic
fin-doh 仙桃 iem gouv duang nyei lungh zangc ba’jaauh biouv
fioux-zoih 秀才1.mienh guai mienh 2. gaeng gueiv nyei dorn dongh lunx
nyei zongc iem jienv jauz-kuqv gu’nyuoz uov deix
fiuv 小 faix [bhn: faix-~, ~-zuangv mienh]
fuqv-gueix 富贵butv zoih butv zieqv; maaih zinh nyaanh camv
gaau 勾
gengx 敬[enzf:respect]
ging 经1. [ziangh hoc] jiex 2.[mingh daaih] jiex
ginx 见buatc
gorng-horh 江河 ndoqv fai ndaaih
gorng-suiv 江水 ndoqv fai ndaaih fai ndoqv nyei uom
gorx 个 dauh
guonx 棍 biaav [bhn: zienh ~ fai cingv-~ fai biaav ~]
haac horngh 下行 aiv nyei uov dangv; mv maaih jaax nyei uov dangv
haengh 行 mingh
haengh orqv 行恶 zoux wuaaic fai zoux baamz zuiz jauv
haengh suonc 行顺 zoux longx fai zoux fiou fiem jauv
haengh youh 行游 mingh saau
hiaang 乡 langz 香 hung
hiaangx 向 hungx jienv mouz norm bung-hungx dauh
hiutv-buv 血宝[enzf:nziaamv-buv]fu’jueiv
hmz-guqv 五谷 mbiaa nyungc dorngx hnangx nyanc nyei ga’naaiv-zuangx
beiv hnangv mbiauh, maeqc, da’caanv, dopc cuax gu’laangh
hongh kuaa 红花[enzf: biangh siqv] sieqv
hongh suiv 红水domh ndoqv
horh 河 ndoqv fai ndaaih
hornh 寒 doh naanc [bhn: mv maaih diex maac heuc gu-~; mv maaih dorn-
jueiv caux jomc kouv heuc ~ gong ~ muv]
hung-in 香烟 dorn [dongh hoz hnoi buov hung gengx mbuo nyei mienh]
in-iaang 鸳鸯aapv nyei mbuox [gorngx heuc “in” maaih jaanx heuc
“yaang”; longc daaih beiv an hnamv doic haic nyei i gox
iv 莫 mv dungx
ix莫mv dungx [hiaang bung waac]
jaax 嫁 longc nqox; bungx sieqv mingh dorng jaa
jangv njietv 广阔jangv haic nyei nyei eix-leiz[hiaang-bung waac]
jangv nqetv 广阔jangv haic nyei nyei eix-leiz
jei 肌 longc dorngx hnyouv nzangc [bhn: kuonx fiem-~; lunc fiem-~] 饥
hnyouv sie [bhn: beic ngorc ~; dimv ~]
jouh daaih 求来hlorpv daaih nyei[dorn-jueiv]
kaanx 看mangc
kiev in 火烟 douz-sioux
kouv 口 nzuih
kuaa-dorv 花朵[enzf: biangh dorv]dorn-jueiv
kuaa-zou 花珠dorn-jueiv
leiz 里 gu’nyuoz [bhn: maengc ~ hei] caux “noic 内 fai duang中” oix lamh
fih hnangv
linh 莲 lotus
linh liouz kuaa 莲柳花 sieqv
liouc 流 torngx mingh
liouh 流 torngx
liouh linh流连baeng ciev jienv doic mv haih dingh fai nzengc
liouz 柳
lorqc 落 ndortv njiec
lorqc yaangh 落阳 yungz [yaac maaih gorngv benx “torqv saeng, saeng,
mbiouh yaangh, torqv seix fai cuotv seix]
louc 路 jauv
loz 老 gox
loz nyienh 老人 mienh gox mienh
lueic 泪 uom-mueic
maanh民 baeqv-fingx fai mienh maanh
maengc命luck or destiny; fate
mbiouh yaangh浮阳 yungz fai cuotv seix
meic未 mv gaengh
mouc 无 mv maaih
mouc maanc cin无万千gengh camv haic nyei nyei eix-leiz
muangh忘la’kuqv蒙mv njang
muic 妹 [enzf: muoc ]
naamh男mh jangc dorn; dorn
ndoqc zeic 独自ganh nduqc dauh
nginx眼 mh zing
nginx zinh眼前[enzf: mh zingh ndaangc][ziangh hoc fai ga’naaiv]
yiem leih fatv haic
ngorx偶 cai doix fai auv-nqox[note: Mienh jienh fiev nyei nzangc lorz mv
buatc maaih iem dinc nauv]
nin年hnyangx
nunc嫩 lunx
nyaangh 娘 maa
nyienh人 mienh/human being
nyietv日hnoi
nyouh鱼[enzf: mbiauz] mv hongh heic daic [bhn: maengc ~]
nyouz女 mh sieqv dorn; sieqv[mbuo nyei fu’jueiv]
nyutc月[enzf: hlaax] mba’hnoi-siaam fai mba’hnoi nyei jorm
nzaic事sic
ong-yieh翁爷 ong caux dae fai mbuo nyei zinh buic mienh
oqv guei乌龟 doc[hiaang-bung waac]
orn jaa安家 longc auv
ormx 暗 [enzf: hmuangx fai hmuangx nyei dorngx] bingx jienv mv bun
mienh hiuv
orqv恶[enzf: ciouv haic; ga’qiex beqv haic]doqc
orqv douv恶肚 hnyouv doqc
qiev in火烟 douz-sioux[hiaang-bung waac]
qoux去 mingh
saaiv使 1. [zinh nyaanh]longc cuotv 2.[dorn-jueiv]zunc nzuih fai heuc tengx
zoux mouz nyungc sic; bhn: ~ kouv
saaix赛beiv hingh fai nzaeng hingh
saeng生1. yungz[bhn: ~ njiec dong-guaa…] 2.nangh[bhn: ~ feiv cing]
saeng-dengv 承顶
saiv使[zinh nyaanh]longc cuotv fai maaiz ga’naaiv
setv杀 daix
sien 身sin新siang
siouc受longc dorngx “zuqc” zangc bhn ~ kouv fai ~ mun寿ziangh duqv
lauh bhn ~ nyuonh
siouv guaav守寡nqox daic liuz mv longc siang-nqox heuc zoux
“siouv guaav”
siu烧 buov
siux笑 jatv fai jietv 少 zoqc
siux nin 少年mienh lunx mienh
siu-yiuh逍遥 njien-youh haic
sorng 双[yietc doix, i norm fai dauh] auv-nqox fai mh zing[ i bung?]
suiv dorngh水塘 uom-njaangh
sux 诉 gorngv mbuox 四biei
tin ndiev天底 lungh ndiev
tingx听 muangx
torqv托
uh guei乌龟 doc
waac话gorngv waac
waanc 万[enzf: ziepc cin] dorngx janx-in wuonh nyei “all fai every” nzangc longc [bhn: ~ maanh; ~ horngh] maaih norm baav ziangh hoc yaac doqc
benx “maanc” [bhn: cin-maanc, maanc muotc]
winh 园biauv
wueih seix为世zoux mienh zoux seix/lomgc auv fai longc nqox
wuoh禾gaeng-zuangx dongh maaih nyim hnangv hmeiv fai maeqc uov deix
yaac 也 dorngx “caux jienv” nzangc longc; [bhn: ninh maaih dauh dorc, ie ~
maaih dauh; meih mv gorngv, ie ~ mv gorngv]
yaangh阳 gorngv taux lungh hnoi nyei, mienh nangh mienh nyei, mh jangc
nyei
yaangh gen阳间mienh nangh mienh nyei lungh ndiev
yangh naih黄泥 uom-baamc fai nie-nyouh yangh
yieh 爷[enzf: ong] dae
yieh nyaangh 爷娘 diex maac
yiem阴gorngv taux hmuangx nyei, mh sieqv dorn nyei, fai mienv nyei
yiem-fei阴司mienv nyei lungh ndiev fai mienv nyei deic-bung
yiem gen 阴间 mienv nyei lungh ndiev fai mienv nyei deic-bung
yiex-yiex夜夜 muonz-muonz
yiv liemh雨淋 mbiungc liemh
youc又dorngx “tipv jienv fai jaa jienv” nzangc daaih longc [bhn: nziaaux
hlo gau ~ aengx duih domh mbiungc caux jienv; ninh zuqc hemx ~
zuqc zioux caux jienv]
yungz养 1. dorh fuqc jueiv 2. uix domh mienh gox nyei ziangh hoc 3. iem
maa nyei ga’sie yungz cuotv daaih
zangc horngh 上行 1.[mienh] hlang nyei uov dangv2.[ga’naaiv]longx nyei
fai jaaix nyei uov dangv
zeic自ganh
zeiv muic子妹 i muoz[maih dauh zeiz dorn maaih dauh zeiz sieqv]
zepv居iem hnangv iem biauv住
ziangh sorng成双 benx auv benx nqox fai benx i hmuangv
zingx 政dorngx “cingx才”nzangc longc;正zaqc, longx fai mv ngau
ziev姐[enzf: dorc] maa
ziev muic姐妹 i muoz-sieqv
zingx正zaqc fai mv ngau政dorngx ‘cingx’nzangc longc
ziqc只dorngx janx in-wuonh “only” nzangc longc
ziu-ziu朝朝hnoi-hnoi fai ndorm-ndorm
To preserve our magnificent Iu-Mien song language, let’s come and learn it together. Please read what I have written and defined and then compare to what you have already known. If you see any mistake please help make correction. Any doubt, please make further research by asking our elderly while they’re still here with us. We don’t have any Iu-Mien elderly where I live so you will be my help and my teacher.
William Yienlin Jyi
Camv-norm mh zing Tengx Jienv doic Mangc Buatc Duqv Gauh Jangv Caux Gauh Cing
E-mail your comments or sugguestions to:
juix waac bun:
[email]jyiwmien@prodigy.net[/email]