Meiv Guoqv Mienh Juix Daaih Nyei Luc In Fienx
美国瑶族寄来的录音信

Mv norm dorng se Meiv guoqv, Ngoh lerh gaang ziou, Po terh laanh six. Nih nhoi yetc cin juov baeqv zetc ziepc nyeic hnyangx, luoc hlax, ziepc feix.
Ye se heuc zoix Zeuz Foux mengh fouv. Juix I joux uac nzuonx domh ziuh deih bung, bun taux mbuo Yiuh Mienh, Yiuh fun, doc muoc, goh youz, dauh dauh duqv haiz duqv hiuv.
Ye yom (yiem) Liaauh guoqv cuot seix hlu daaih, ueic av deih bung lunc daaih, zepv nv duqv. Oix zuqc baux (biaux) guiex ganh (janh) taiv deih bung, yom I buo bei (biei) hnyangx liuz, naaiv nyei ganh taaih fouv, mai iv congh bun yom Taih guoqv. Cingx daaih aengx zuqc cuotc gauv daaih taux naaiv Meiv guoqv deih bung.
Dongh naaiv, yetc cin juoqv baeqv cietv ziepc betv uov norm hyangh dauh, nih zanc funx daaih yom duqv buo hnyangx lengh, av lamh deix zaaic bei hnyangx a.
Ye mbuo yom naaiv deih bung haaix yungc yac baengh baengh yom duqv guiex. Yenh youh haic yax se maiv maaih, ndortv naanc yac se miav maaih, baengh baengh yom duqv guiex.
Ye mbuo hnamv zuqc naaiv luoqc hlax, nyic ziepc hngz naaiv, maaih dauh Meiv guoqv nyei ganx, oix daaih naaiv Baqc jing nziaauc (nzaauc). Coc oix taux camh norm dorngx nziaauc. Ye mbuo hnamv zuqc, aengx maaih Yiuh Mienh yom naaiv qaeqc deic, maiv haih luh kuqv, bun joux bav uac loz laux mienh muoz doic.
Doix zuqc mueih mbuo haaix dauh haiz liuz ye nyei uac, maaih uac bun ye mbuo, se ei jenv ye mbuo fiev uov, fienh kuqv uov, fiev fienx daaih.
Nih zanc ye mbuo baux (biaux) taux naaiv Meiv guoqv deih bung, yetc zungv funx daaih, maaih ba (bia) guqv (juqv) cin lengh dauh Yiuh Mienh, dauh dauh se baengh baengh yom duqv guiex. Yetc juerngc maaih ziex fingx mienh. Ziepc nyeic fingx nv nzoih nv bac, se maaih camh fingx nyei. Deih yetv daaih fingx Zeuz, haaix yungc yac se daaih leih maiv gu, maiv gu nyei.
Haaix dauh oix naaic taux cienh ceqv gauv lo, ye se tuv mbuox taux mueih mbuo. Nih zanc gorngv daaih, maaih bei buic mienh hnangv. Domh Mienh gorngv uov: “Jin, fux, uaanx, yonh. Ye mbuo maaih jah finh ziouv gorngv taux, Zeuh hoqc luoqc lorngh; Zeuh haengh hngz lorngh. Doix zuqc gu deix fatv deix, deih faanh mbuo Mienh muoz doic, haaix dauh haiz liuz se oix zuqc laanh loz laanh, maiv duqv luh kuqv. Haaix bung haiz gorngv maaih fienx longx, fienx ciouv, domh nzoih se duqc haiz duqv hiuv.”
Mangc gax mueih mbuo naaic bung, haaix norm dorngx gorngv taux nauc nyitc nyei gauv fai, haaix yungc zingh yiouh nix? Sux deix daaih bun ye mbuo naaiv bung duqv haiz hiuv?
Ye mbuo bun naaiv deix uac daaih nv bac, Mienh gorngv uox uac se gan nziaaux daaih, gan lungh daaih hnangv, yac mangc nx buotc. Bei duqv taux mueih mbuo nyei buoh ndev yac nx hiuz, maiv taux yac nx mengh baeqc. Oix maaih uonc qex nyei, haih duqv uac caux uac fangh buerngh. Mangc gax huz nqang daaih, ye mbuo maaih ziangh huc, ye mbuo oix daaih naaiv kaeqc deic nziaauc. Ye mbuo aengx lz jienv muieh mbuo Mienh muoz doic.
Ye mbuo nih zanc taux naaiv deih bung daaih, ye mbuo zoux nyanc zoux hoqv nyei gauv, yom naaiv Meiv guoqv deih bung, nih mbuo hnangv haaix no zoux. Ninh mbuo hnangv haaix no nyenc, ye mbuo yac gan jienv hnangv haaix no nyanc. Nx hnangv mbyo uov zanc maaih liangh ndeic gong zoux av.
Ye mbuo oix tuv hiuv deix mueih mbuo naaiv bung Mienh muoz doic, Ih jax huc mueih mnuo se hnangv haaix no zoux, hnangv haaix no nyanc? Zoux lingh zoux deic fai, zuerngx zah nix? Zuerngx haaix yungc cunh gaeng liangh ndeic? Gorngv daaih bun ye mbuo duqv haiz duqv hiuv. Ye mbuo doh daaih an jenv hnouv jangx, louh hnouv corngh nx duqv dix laaih doic.
Fiev fienx daaih bun ye mbuo yac duqv, siou uac daaih bun ye mbuo muerngx yac duqv. Ye nyei uac dauh, ye hnamv ziangx, oix gorngv camv nyei, yac se mangc nx buotc, se gorngv mbuoqc naaiv hnangv. Huz nqang mbuo maaih uonc qex haih duqv buerngh.
Haiax dauh duqv haiz liuz ye nyei uac, tuv deix mueih mbuo nyei uac daaih, gorngv jenv mueih mbuo yom nyei dorngx daaih bun ye mbuo.
Tuv laengz zingh.
Mbuoqc naaiv.
Meiv guoqv: Zeuz Foux mengh fouv
1982.6.14


勒丁布壮摘自1983年盘承乾、邓方贵、刘保元编著的《瑶语》。