本帖最后由 勒丁布壮 于 2009-6-24 16:56 编辑

Bienh Hungh Nyei Gouv
盘王的故事
Zinh hnoi maaih dauh Baengh hungh, tin Guh hungh borngz zaangx. Baengh hungh beic Guh hungh mboqv suei av, Baengh hungh ziouc cuotv hongh borngv gorngv: “Haaix dauh mboqv duqv hingh Guh hungh nyei uac, ye ziouc bun dauh sieqv ninh zoux auv.”
Hongh borngv cuotv av siec hnoi siec muonz, du nx maaih mienh gaamv laengz naaiv jinc sic.
Derh nqang maaih dauh Longh qaenv zoqv uov zung hongh borngv maeqv njiec daaih, doh mingh taux Baengh hungh nzuh hmien mingh.
Baengh hungh gorngv: “Meih naaic dauh Longh qaenv gaamv mingh mboqv Guh hungh?” Longh qaenv hnaqv hnaqv dangh merh nqorngv ziouc mingh av. Mingh av siec hnoi siec muonz, yangh guiex av ziex norm gemh (jemh), ziouh guiex av ziex diuh ndaaih (suerng), mingh taux av Guh hungh nyei hungh dinc.
Guh hungh mangc buotc Longh qaenv nyei ziangh huc, ninh hav hav nyei gatv (jatv) jenv gorngv: “Dungz daaih gomc (jomc), guv (juv) daaih foux. Baengh hung nyei guv baux daaih kaux yie, ih zanc lungh ndiev du guei yie gunv. Zoqv diuv daaih hopv, zoqv diuv daaih hoqv.”
Guh hungh bueix gau njormh ndortv ndortc nyei, hnangv zouv gungh siaaux no. Taux ndaamv muonz Longh qaenv ziouc zoqv Guh hungh ngaatc daic mingh av.
Derh nqang, Longh qaenv ndaam jenv Guh hungh nyei merh ngorngv nzuonx daaih bux Baengh hungh.
Baengh hungh mangc buotc Guh hungh nyei merh nqorngv, ninh ah hneiv haix ah hneiv. Derh nqang Baengh hungh ziouc heuc ninh nyei nouh gauv zoqv diuv ov daaih baaiv jenv. Heuc ninh nyei dauh dauh mueiz daaih tin Longh qaenv hopv diuv, gongh hoc naaiv muonh heiv sic.
Hopv diuv hopv taux ndaamh laaic nyei ziangh huc, Baengh hungh heuh ninh nyei domh siepv cuotv daaih, Longh qaenv ziouc mbanx mbanx dangh merh nqorngv. Baengh hungh youc heuc deih nyeic sieqv cuotv daaih, Longh qaenv yac mbanx mbanx dangh merh nqorngv. Baengh hungh ziouc heuc deih faam sieqv cuotv daaih, Longh qaenv ziouc mingh ngaatc jenv deih faam sieqv nyei junh juoqv.
Longh qaenv tih Baengh hungh nyei deiih faam sieqv puix huon iv houx, Baengh hungh deih faam siepv doix ninh mac gorngv: “Hih! Ninh lungh hnoi zanc se Longh qaenv, lungh muonz zanc se benx yetc dauh nzueic nyei hoqc saeng jin le!”
Ninh mac gorngv: “Uov mueih heuc ninh lungh hnoi zanc yac benx mienh mah!”
Derh nqang, Baengh hungh derh faam sieqv zioux zoqv Longh qaenv an bieqc zaangx mingh zaang av siec hnoi siec muonz. Ganh uov guiex Longh qaenv lungh hnoi zanc tin lungh muonz zanc du benx yetc dauh hoqc saeng jin av.
Naaiv hitv, Baengh hungh heuc Longc qaenv dorng hungh diex. Ninh nx nyunc dorng, ninh ziouc doh jenv ninh auv faaux naamh sen mingh orn ja loqc nipc.
Derh nqang, Baengh hungh nyei deih faam sieqv, yungz av luoqc naamh luoqc nyouz, bun maaih ziepc nyeic fingx Yiuh Mienh. Ziouc zeiz maaih fingx: Bienh, Uiangh, Zeuz, Leiz, Dangc, Borngh, Bungz, Sernv, Beu, Zaengc, Huh.
Mbuo zipc nyeic fingx Yiuh Mienh se hnangv no daaih nyei.
Yom ueic Longh qaenv borngz zaangx maaih gong laauh, mbuo ziepc nyeic fingx Yiuh Mienh nyei zeih fun, buerng ninh zoux Bienh hungh.